ردت الفنانة إلهام شاهين على الاتهامات التي وُجهت لها بعد انتشار فيديو يظهرها تضحك مع الفنانة هالة صدقي خلال جلسة الراحل يوسف شاهين ضمن فعاليات مهرجان الجونة السينمائي، بينما كانت الفنانة لبلبة تتحدث، مؤكدة أن ما حدث كان مزاحًا بين صديقتين ولا يحمل أي إساءة.
وقالت إلهام شاهين: “الحوار اللي كان بيني وبين هالة مش المفروض أقول إحنا كنا بنقول إيه بس الحقيقة أنا بقولها أنا هموت عايزة أروح التواليت، قالتلي بعيد وخلاص قربنا نخلص الندوة، وهزرت وقالتلي أعمليها مكانك وخلاص وضحكنا وشاورت ليسرا يلا خلصوا الندوة عايزة أروح الحمام، هزار بين اتنين أصحاب، ولبلبة ملهاش دخل بيها تمامًا”.
وأضافت إلهام شاهين: “لبلبة حبيبتي وصاحبتي وإحنا عشرة عمر مع بعض وهي عارفة هي إيه بالنسبة لي، هي صديقة غالية جدًا، والمسألة متخصهاش تمامًا، إحنا بنتكلم في موضوع تاني خالص، وهالة دايمًا بتقول قفشات تضحك وضحكنا، الموضوع كوميدي جدًا، هي بتهزر بتقولي اعمليها مكانك، مش هنعرف نقوم لأن لو قمنا اللي هيقولولنا تعالوا صوروا ويوقفونا في الطريق، والتواليت بعيد، وأنا فعلاً مش قادرة، وبقول ليسرا يلا عشان نقوم مرة واحدة”.
وختمت إلهام شاهين بالقول: “حاجة غريبة جدًا أن الناس ليه متصورين كده عشان هما بيتنمروا علينا طول الوقت، فمتخيلين أننا بنتنمر على بعض، بالعكس إحنا الفنانين متماسكين جدًا ومفيش حاجة بينا أبدا، كلام سخيف وعبيط، ومش ممكن قاعدين يتصيدوا، عايزين يخلقوا لنا غلط مش لاقيين غلط فبيخلقوا”.
